Mayor Belmonte, pinadali na ang pagkuha ng business permit
MANILA, Philippines — Mas pinadali ni Quezon City Mayor Joy Belmonte ang pagkuha ng business permit na hindi na kailangang pumunta ng city hall dahil isang “click” na lamang ang kailangan sa pagproseso nito.
Ang pahayag ay kasunod ng pag-100 percent on-line ng Business Permits and Licensing Department (QC BPLD) noong nakaraang linggo.
Ang mga may-ari ng negosyo ay maaaring magbayad para sa kanilang business tax assessment nang hindi bumibiyahe o pupunta pa sa city hall sa pamamagitan ng QC E-Services platform.
Ayon kay Belmonte, ang hakbang na ito ay bahagi ng streamlining efforts ng lungsod kasama ang online business permit application, na dati nang inilunsad noong Oktubre 2020.
Paliwanag naman ni Margie Santos, hepe ng BPLD, lahat ng may-ari ng negosyo na gustong humiling ng kanilang local business tax assessment ay maaari nang gawin ito sa pamamagitan ng QC E-Services portal (https://qceservices.quezoncity,gov.ph) sa ilalim ng “Pay Business Tax ” menu.
Pinaalalahanan ni Santos ang mga nagbabayad ng buwis na ihanda ang lahat ng mga naaangkop na dokumento na dapat i-upload sa system tulad ng Notarized Monthly Gross Sales, Proof of Authority, Certificate of Authority mula sa DTI, at Mayor’s Permits ng iba pang sangay sa labas ng Quezon City.
- Latest