RORO ship tumagilid: 4 sasakyan nahulog sa dagat, 23 nasagip
MANILA, Philippines — Nagsasagawa ngayon ng imbestigasyon ang Philippine Coast Guard (PCG) kaugnay sa pagtagilid ng isang RORO vessel na sanhi ng pagkahulog sa dagat ng sakay nitong tatlong dump truck at isang van habang nasagip ang 23 katao sa Real Port sa Brgy. Ungos, Real, Quezon Biyernes ng hapon.
Sa ulat ng Real Police, nakadaong ang LCT Balesin cargo vessel habang nagkakarga ng mga rolling cargoes nang hindi umano makalkula ng crew ang balanseng bigat ng mga cargo na naging sanhi ng pagtagilid nito. Apat na sasakyan ang tuluyang dumausdos at nahulog sa dagat.
Nakalangoy naman patungo sa ligtas na lugar ang 9 na crew at 14 na pasahero, kabilang ang apat na driver ng lumubog na mga cargo truck.
Wala namang nasaktan sa nangyaring insidente.
Ang naturang RORO na pag-aari ng Alphaland Balesin Island Club Incorporated ay patungo sana sa Polilio Island nang maganap ang aksidente. Sinubukan pa umano ni Captain Ely Gajarion na dalhin sa malalim na parte ng tubig ang barko para mabalanse ito pero tuluyan nang tumagilid.
- Latest