Pulis inireklamo ng binatilyo ng pang momolestiya, inaresto
MANILA, Philippines — Isang pulis sa Las Piñas City ang inaresto makaraang ireklamo ng isang 15-anyos na binatilyo na pangmomolestiya sa loob mismo ng istasyon ng pulisya kahapon.
Itinago muna ng pulisya ang pagkakakilanlan sa biktima at maging sa pulis na inaakusahan.
Sa ulat, naganap ang pananamantala umano ng suspek habang nagsasagawa ng morning devotion at Bible study ang ina ng biktima, na isang pastora na nakadestino sa Alabang Zapote station.
Lumabas ang binatilyo na nilapitan ng pulis na nagsisilbing desk officer ng oras na iyon.
Ayon sa binatilyo, hinawakan umano ng pulis ang kaliwang balikat at dibdib niya at gumapang sa pantalon at maselang bahagi niya.
Ipinasok pa siya umano ng pulis sa isang opisina at doon itinuloy ang umano’y pang-aabuso.
Matapos nito, isinumbong ng binatilyo sa ina ang pangyayari na agad namang nagsampa ng reklamo.
Mismong si Las Piñas City Police chief Colonel Jaime Santos ang nagtungo sa istasyon at umaresto sa kaniyang tauhan.
Tumangging magbigay ng pahayag ang suspek, na nakatakdang sampahan ng sexual assault at paglabag sa Republic Act 7610 o Child Abuse Law.
- Latest
