Halos 2 milyon doses ng COVID-19 vaccine mapapaso sa Hunyo
MANILA, Philippines — Aabot sa dalawang milyong doses ng COVID-19 vaccines ang mapapaso sa pagtatapos ng buwan ng Hunyo.
Ito ang inamin ni Department of Health (DOH) Undersecretary Myrna Cabotaje na maaari pang madagdagan ang bilang dahil sa hindi pa ito pinal.
“Sa ating expiring na vaccine, we will have the final numbers by end of May. But hanggang June we are expecting kung hindi ma-jab almost 2 million kung hindi magamit by end of June,” saad ni Cabotaje.
Nagsumite naman ng ‘demand forecast’ ang DOH ng 34 milyong doses na binubuo ng mga pampalit sa mga nag-expire na at mag-e-expire pa lang na doses.
Nagpasabi naman ang COVAX sa Pilipinas na ang pampalit sa mga bakunang ito ay manggagaling sa iba’t ibang sources hindi lamang sa kanila.
Ngunit kinukunsidera ng COVAX na palitan ang mga bakuna na binili ng pamahalaan maging ang binili ng mga pribadong sektor at ng mga lokal na pamahalaan.
Sa kasalukuyan, nasa 73.7 milyong Pilipino na ang nabigyan ng kahit isang dose ng bakuna habang nasa 69.1 milyon ang bakunado na.
- Latest
