1-linggo matapos ang halalan Pinas walang naitalang COVID-19 surge
MANILA, Philippines — Inihayag ng OCTA Research Group na wala pang naitatalang panibagong COVID-19 surge sa bansa, isang linggo makaraan ang pagdaraos ng National at Local Elections nitong Mayo 9.
Sinabi ni OCTA Research fellow Dr. Guido David sa Laging Handa public briefing kahapon na bagama’t nagkaroon ng bahagyang pagtaas ng bilang ng COVID-19 cases, ito ay bumaba rin naman.
“Wala pa tayong nakikitang increase ng cases doon sa campaign rallies, sorties. February pa tayo nagkaroon ng campaigns, wala pa namang nagkakaroon ng pagtaas ng kaso na talagang sustained,” paliwanag niya.
“May nagsasabi na maghintay pa tayo up to two weeks. So far wala pa naman tayong nakikitang indication na may clustering of cases dahil doon sa recent elections natin noong May 9,” dagdag pa niya.
Sa kabila nang kumpirmasyong nakapasok na sa Pilipinas ang Omicron subvariant BA.2.12.1. ay walang nakikitang anumang banta na muling magkaroon ng surge ng COVID-19.
Una nang inianunsiyo ng Malacañang nitong weekend na ang Metro Manila at iba pang lugar sa bansa ay mananatili sa Alert Level 1 hanggang sa katapusan ng buwang ito.
- Latest
