Robin kinuhang legislative consultant si Panelo
MANILA, Philippines — Kahit pa natalo sa pagka-senador ay hindi mababakante si Atty. Salvador Panelo dahil kinuha siyang adviser at mentor ni senatorial frontrunner Robin Padilla.
Ito ang inihayag ni Padilla sa pamamagitan ng post sa Facebook dahil kailangan niya ng pambato sa usapin ng batas sa Senado lalo pa’t aamiyendahan ang Konstitusyon.
“Bismillah. Kailangan ko ng pambato sa usapin ng batas pagdating sa senado,” ani Padilla sa kanyang post sa FB kung saan naglagay pa siya ng mga larawan habang kausap si Panelo.
Sinabi rin ni Padilla na ang pagpapalit ng Saligang Batas ay hindi magiging madali dahil maaapektuhan ang mga oligarko na nagtatago sa 1987 Constitution.
Hindi man aniya nagtagumpay si Panelo na tinawag pa niyang idol ay magkakasama pa rin sila sa Senado at walang magbabago sa kanilang isinusulong na pagbabago.
Idinagdag ni Padilla na walang makakapigil sa rebolusyon at si Panelo ang kanyang magiging legislative consultant, adviser at mentor. - Joy Cantos
- Latest