Marcos binati nina US President Biden at Chinese President Xi
MANILA, Philippines — Binati nina US President Joe Biden at Chinese President Xi Jinping si dating senador Ferdinand “Bongbong” Marcos Jr., na nakaambang ang pagkapanalo sa pagka-presidente ng Pilipinas.
Nakasaad sa statement na binanggit ni US President Joe Biden ang kahalagahan nang pagpapalakas ng alyansa ng Pilipinas at Amerika habang nagtutulungan sa maraming isyu katulad nang paglaban sa COVID-19, problema sa klima, pagpapalakas ng ekonomiya at pagrespeto sa karapatang pantao.
Ikinagalak naman ni Marcos ang pagkilala sa kaniyang tagumpay ng American President na mahabang panahon ng kaalyado ng Pilipinas.
Pinuri naman ng China ang Pilipinas sa mapayapang halalan nitong nakaraang Mayo 9 at nagpahatid ng pagbati kay Marcos.
Ayon kay Huang Xilian, Ambassador ng China sa Pilipinas, isang liham ang ipinadala ni Chinese President Xi Jinping kay Marcos kung saan nagpahatid ito nang pagbati.
Ayon pa sa opisyal ng China, patuloy ang kanilang maayos na pakikipag-ugnayan sa Pilipinas para sa mas maayos na relasyon.
Bukod sa US at China ay pinuri na rin ng Japan, at European Union ang maayos na halalan sa bansa kasabay din ng pagbati kay Marcos sa kanyang panalo. - Joy Cantos
- Latest
