DOH minomonitor ang napaulat na ‘Omicron XE’ variant sa Thailand

MANILA, Philippines — Nakikipagpulong na ang Department of Health (DOH) sa World Health Organization (WHO) upang maberipika ang napaulat na ‘Omicron XE’ sa Thailand at mabatid kung may dagdag na panganib ito sa publiko na madadapuan nito.

Patuloy naman umano ang monitoring at oberbasyon dito upang mabatid kung makakategorya ito na panibagong ‘sub-variant’ ng Omicron o panibagong variant ng COVID-19.

Aalamin din kung nagpapakita ito ng panibagong katangian kumpara sa mga naunang variants.

Tiniyak rin naman ng DOH na patuloy nilang minomonitor ang case trends sa bansa sa tulong ng Philippine Genome Center (PGC).

Una nang nagpalabas ng babala ang World Health Organization (WHO) hinggil sa bagong mutant XE variant ng Omicron na mas mabilis umanong makahawa kumpara sa iba pang strain ng COVID-19.