Nilagdaang Public Service Act, lilikha ng maraming trabaho
MANILA, Philippines — Lilikha ng maraming trabaho at agad na makakabangon ang bansa sa pandemya ang nilagdaang batas para sa pag-amyenda ng Public Service Act.
Pinuri ito ni San Jose Del Monte City Rep. Florida “Rida” Robes na isa sa may akda ng House Bill No. 78 na bersiyon ng Mababang Kapulungan sa pag-amiyenda sa Public Service Act.
Sinabi ni Robes na ang pagbubukas ng ilang mga industriya para maging pag-aari na ng mga dayuhan ay higit pang makakaakit para sila mamuhunan sa ating bansa.
Isa si Robes sa mga inimbitahan sa Malacañang nang lagdaan ni Pangulong Rodrigo Duterte ang Republic Act (RA) No. 11659 o ang “An Act Amending Commonwealth Act No. 146 na kilala bilang Public Service Act” noong nakaraang linggo na nagpapaluwag sa paghihigpit sa mga dayuhang mamumuhunan upang payagan silang maglagak sa lokal na negosyo ng 100 porsiyento ng kanilang puhunan.
Sa kabila nito na ilang mga industriya ang hindi sakop ng batas at hanggang 40-porsiyento lamang ang kanilang puwedeng ibuhos na puhunan tulad ng pamumuhunan sa distribusyon at transmission ng elektrisidad, pipeline transmission ng mga produktong petrolyo, water at wastewater pipeline distribution, kabilang ang sewage pipeline, mga daungan at pampublikong sasakyan.
- Latest
