Murder suspect na nang-hostage ng pamilya, napatay
MANILA, Philippines — Napatay ng mga pulis ang isang umano’y murder suspect matapos na i-hostage ang pitong miyembro ng isang pamilya sa Quezon City kahapon ng madaling araw.
Ang nasawing suspek dahil sa mga tama ng bala sa katawan ay nakilala lamang sa pangalang Arthur Agpalo alyas “Eagleman”.
Hinostage nito ang mga biktima na nakilalang sina Rosalinda Dalumpines, 54; Reynan Dalumpines, 25; Ma. Salvie Dalumpines, 14; Riza Dalumpines, 12; Arjay Dalumpines, 19; ang isang taong gulang na sanggol na si Renzo Andrei Dalumpines, at Marjorie Lacumba, 21, pawang naninirahan sa 264 Visayas Ext., Pasong Tamo, Quezon City.
Batay sa ulat ng Quezon City Police District (CIDU-QCPD), alas-2:50 ng madaling araw nang maganap ang pangho-hostage sa mga biktima.
Lumilitaw sa imbestigasyon ng Holy Spirit Police Station (PS 14), bago ang engkwentro ay nagsagawa ng follow-up operation ang kanilang mga pulis sa nangyaring shooting incident noong Pebrero 14, nang may magbigay ng impormasyon kung saan nagtatago ang mga suspek na alias Suysoy at Eagleman.
Hindi naman nabigo ang mga otoridad at naaresto si Suysoy sa kasong paglabag sa Republic Act 10591 at frustrated murder sa Commonwealth Avenue habang ang suspek na si Agpalo ay tumakas at pinaputukan ang mga otoridad.
Nasundan pa rin ng mga pulis si Agpalo sa tahanan ng umano’y nobya nito sa 108 Santan St., Pasong Tamo, at muling pinaputukan ang mga operatiba ng PS 14.
Pumasok naman ito sa tahanan ng mga biktima at ginawang hostage ang mga ito at ilang sandali ay nabaril ito ng mga pulis na agad nitong ikinamatay.
- Latest
