Guidelines sa paggawa at pagbenta ng paputok inilabas ng PNP

MANILA, Philippines — Inilabas na ng Philippine National Police (PNP) Firearms and Explosives Office (FEO) ang mga guidelines sa paggawa, pagbebenta, at paggamit ng mga paputok.

Ayon kay PNP FEO Director Brigadier General Rommil Mitra, bawal ang “oversize” firecrakers na may bigat na mahigit one-third teaspoon o mahigit sa 0.2 grams na pulbura.Bawal din aniya ang may sobrang ikling mitsa na nauubos sa loob ng tatlong segundo, gayundin ang sobrang haba na mahigit anim na segundo bago maubos.

Hindi rin pinapayagan ang mga imported at walang label na paputok at mga paputok na may sulphur o phosphorous na inihalo sa chlorates.

Ilan sa mga halimbawa ng mga bawal ay ang watusi, piccolo, super lolo, atomic triangle, large judas belt, large bawang, at iba pa.

Nabatid naman kay PNP Spokesperson Colonel Rhoderick Augustus Alba na naglabas na ng kautusan si PNP Chief General Dionardo Carlos sa lahat ng mga police commanders na makipag-ugnayan sa kani-kanilang mga local government units para matukoy ang mga firecracker zone at mga lugar kung saan papayagang magbenta ng paputok.