Food delivery rider tiklo sa pagdeliber ng shabu
MANILA, Philippines — Isang food delivery rider ang inaresto nang mabisto na sa halip na pagkain ay shabu ang idinideliber niya sa kaniyang mga parokyano, kahapon ng umaga sa Sta.Cruz, Maynila.
Kinilala ang naarestong si Eduardo Delos Santos, alyas Ed, 48, Food Panda rider, at nakatira sa No. 2051 Oroquieta, Brgy. 346, Sta. Cruz, ng naturang lungsod.
Sa ulat, alas-8:00 ng umaga nang maaresto si Delos Santos sa kanto ng Oroquieta at Yuseco Streets sa Brgy. 346 nang makatanggap ng tip ang mga pulis ukol sa magaganap na delivery ng iligal na droga ng isang rider sa nabanggit na lugar.
Agad na rumesponde ang mga pulis at naaktuhan nga ang isang delivery rider na angkop sa deskripsyon ng impormante kausap ang isang lalaki.
Nang sumulpot at magpakilala ang mga pulis, nagtatakbo ang dalawang lalaki ngunit nagawang makorner ng mga pulis si Delos Santos.
Nang halughugin ang kaniyang posesyon, nadiskubre ang pitong plastic sachet na naglalaman ng tinatayang tatlong gramo ng hinihinalang shabu na nagkakahalaga ng P20,400.
Kinumpiska rin ng mga pulis ang gamit niyang Mio Soul type scooter, susi, at kaniyang cellular phone na gamit sa transaksyon.
- Latest
