China ‘trespassing’ sa Ayungin Shoal — Lorenzana

MANILA, Philippines — Tinawag ni Department of National Defense (DND) Secretary Delfin Lorenzana na “trespassing” ang China sa Ayungin Shoal at walang karapatan ang mga ito dito.

Ang pahayag ng kalihim ay matapos sabihin ni Chinese Foreign Ministry Spokesperson Zhao Lijian na dapat nang alisin ng Pilipinas ang nakasadsad na BRP Sierra sa Ayungin Shoal.

Ayon kay Lorenzana, may soberanya ang Pilipinas sa Ayungin Shoal dahil pasok ito sa Exclusive Economic Zone (EEZ) ng Pilipinas.

Paliwanag ni Lorenzana, 1982 pa na-award ng United Nations Convention on the Law of the Sea ang EZZ ng Pilipinas sa Ayungin Shoal kung kaya’t malaya tayong gawin ano man ang gusto nating gawin sa lugar.

Pagdidiin pa ng kalihim, dapat kilalanin ng China ang UNCLOS dahil pumirma sila sa kasunduan.

Maliban dito, ay wala aniyang legal o historical claim ang China sa lugar base sa ruling ng Arbitral Tribunal.

Kaya dalawa aniya ang dokumentong hawak ng Pilipinas na patunay na pag-aari ng bansa sa Ayungin Shoal.