Pangulo ng samahan ng jeepney driver, todas sa tandem
MANILA, Philippines — Isang lalaki na pangulo ng isang jeepney drivers’ association ang nasawi nang tambangan at pagbabarilin ng riding-in-tandem habang papauwi na sa kanilang bahay kamakalawa ng gabi sa Quezon City.
Namatay habang nilalapatan ng lunas sa ospital ang biktimang si Jessie Dela Cruz, 46, operations manager ng UPV Trucking and Hauling Service, presidente ng isang asosasyon ng mga jeepney driver at residente ng 102 Norzagaray Road Sta. Maria, Bulacan.
Sa ulat, bago naganap ang krimen, alas-8:00 ng gabi sa East Service Road sa Brgy. Unang Sigaw, sa Balintawak ay sakay ng pulang Mitsubishi Adventure (NAS-4945) ang biktima mula sa isang birthday party.
Habang binabagtas ang kahabaan ng East Service Road ay biglang sumulpot ang isang motorsiklo lulan ng mga suspek at dinikitan ang sasakyan ng biktima at saka pinagbababaril.
Kahit sugatan ay napatakbo pa ng biktima ang sasakyan upang tumakas sana ngunit hinabol pa rin ng mga suspek at muling pinaputukan bago humarurot palayo sa lugar.
- Latest