Drug raid: Chinese utas sa P510 milyong shabu

MANILA, Philippines — Dead on the spot ang isang Chinese national nang ito ay makipagbarilan sa mga otoridad nang salakayin ang isang warehouse sa Brgy. Santol, Balagtas, Bulacan, kamakalawa ng hapon.

Kinilala ang nasawi na si Wu Zishen, 50 habang nakatakas ang kasamahan nitong si alyas Chen Hongli.

Sa ulat, alas-5:40 ng hapon nang magkasa ng operasyon ang PDEA at Bulacan police sa Warehouse No.3 Grand SG Summit Development Corp., Compound sa nasabing barangay na kung saan ay nakatunog ang suspek na pulis ang kanyang ka-deal.

Sa halip na sumuko ay bumunot ito umano ng baril at nakipagbarilan na kung saan ay gumanti ng putok ang mga otoridad na siya nitong ikinamatay.

Nasamsam sa suspek ang 75 kilo ng shabu na nakalagay sa green tea bag at nagkakahalaga ng P510 milyon, Cal.45 pistol, dalawang cellphone at buy-bust money.

Nauna nang iniulat ng PDEA na tatlong Chinese nationals ang naaresto nila sa isang buy-bust operation sa Brgy. San Bartolome sa Novaliches, Quezon City, na nagresulta rin sa pagkakumpiska ng 127 kilo ng shabu na nagkakahalaga ng P863.6 milyon. - Mer Layson