Dineploy sa SONA 51 pulis na kumpleto-bakunado positibo sa COVID-19
MANILA, Philippines — Nagpositibo ang 51 sa 82 pulis ng Talipapa Police Station 3 ng Quezon City Police District (QCPD) na idineploy sa katatapos lang na State of the Nation Address (SONA) ni Pangulong Rodrigo Duterte.
Ito ang kinumpirma ni Quezon City Police District (QCPD) Director P/BGen.Antonio Yarra sa isang pulong balitaan.
“118 of PS-3 participated in our SONA deployment and then 51 of them were tested positive but take note the test was made on July 23,” ayon pa kay Yarra.
Nabatid na namahala ang mga naturang pulis sa routine security sa kahabaan ng Commonwealth Avenue at Civil Disturbance Management Team sa UP Techno Hub.
Sinabi pa ni Yara, 161 ang mga tauhan ng PS-3 na sumailalim sa RT-PCR test at 51 sa kanila ang nagpositibo sa virus.
Tiniyak naman ni Yarra na ang mga nagpositibong pulis ay pawang mga asymptomatic dahil fully vaccinated na sila.
Iniulat din niya na 90% ng mga pulis nila ay nakatanggap na ng tig-dalawang dose ng bakuna laban sa COVID-19.
Sa ngayon ay naka-quarantine na ang mga nagpositibong pulis sa Hope Facility sa Quezon City at nagpapagaling habang patuloy ang pagsasagawa nila ng contact tracing at disinfection sa kanilang presinto.
Pansamantala namang papalitan sa puwesto ang mga pulis na nagpositibo upang hindi maapektuhan ang trabaho sa Station 3. - Angie Dela Cruz
- Latest
