Mister minartilyo at sinaksak ng mag-utol
MANILA, Philippines — Namatay noon din ang isang 40-anyos na mister matapos pagtulungang hatawin ng martilyo at pagsasaksakin ng kanyang kainuman na magkapatid sa Sitio Guwaan, Brgy. Pawa. Masbate City, Masbate, kamakalawa ng tanghali.
Kinilala ang nasawi na si Romel Aspira Fundal, may-asawa habang tinutugis na ng mga pulis ang magkapatid na suspek na kinilalang sina Ernesto Tugbo Antipolo, 42; at Gener, 52, pawang residente ng Purok-7 ng naturang barangay.
Sa ulat ng pulisya, bago naganap ang krimen, alas-12:50 ng tanghali ay nakitang nag-iinuman ang biktima at mga suspek.
Gayunman, nang malasing ang mga ito ay nagkaroon nang pagtatalo at dito ay hinawakan ni Ernesto ang mga kamay ni Fundal habang kumuha naman ng martilyo at patalim si Gener.
Dahil sa mahigpit na pagkakahawak ay hindi nakakilos nang hatawin ng martilyo at pagsasaksakin ni Gener ang biktima sa iba’t ibang bahagi ng katawan na agaran nitong ikinamatay.
- Latest