Sunog sumiklab sa Quezon City: 100 pamilya nawalan ng tahanan

MANILA, Philippines — Nasa 100 pamilya ang nawalan ng tahanan sa isang sunog na tumupok sa may 30 kabahayan sa Quezon City kahapon ng hapon.

Batay sa ulat ng Quezon City Bureau of Fire Protection (BFP), dakong alas-12:44 ng hapon nang magsimulang sumiklab ang apoy sa isang tatlong palapag na tahanan sa 55 Road 7, Brgy. Project 6, at pagmamay-ari ng isang Ma. Theresita Sastre, 49.

Nagsimula umano ang sunog sa stock room sa ikalawang palapag na inookupa ng pamilya Sastre at mabilis na kumalat sa mga kalapit na bahay na pawang gawa sa mahihinang materyales.

Umabot ng ikatlong alarma ang sunog bago naideklarang under control dakong alas-2:09 ng hapon at fireout ng alas-3:16 ng hapon.

Sa pagtaya ng mga awtoridad, aabot sa humigit kumulang na P100,000 ang halaga ng mga ari-ariang tinupok ng apoy. Wala namang nasaktan o nasugatan sa sunog na inaalam pa ang naging sanhi.