COVID-19 vaccination proof gagawing digital

MANILA, Philippines — “Magkaroon ng digital ID sa mga nakakumpleto na sa bakuna ang target ng gobyerno.”

Ito ang sinabi ni Cabinet Secretary Karlo Nograles at mahalaga ang QR Code na ibibigay sa mga bakunado.

Sa kasalukuyan ay nagbibigay ang mga local government units ng cards sa mga nabigyan na ng bakuna na nagsisilbi rin nilang records na kung saan nakalagay sa card ang impormasyon ng brand ng bakuna, ilang doses ang ibinigay at kailan at saan ito natanggap.

Sinabi rin ni Nograles na tinatalakay na nila kung ano ang mga benepisyong makukuha ng mga kumpleto na ang bakuna laban sa mga hindi pa rin nagpapabakuna.

Bukod dito ay isinusulong ang hindi na pagsasailalim sa RT-PCR tests sa tuwing pupunta sa mga tourists destinations.