Paglabag sa karapatang pantao, sisilipin— DOH
Paghihiwalay ng bakunado at ‘di bakunado
MANILA, Philippines — Naniniwala ang Department of Health (DOH) na mahaba-habang diskusyon at sisilipin din ang paglabag sa karapatang panatao ang inihihirit na paghihiwalay ng mga taong nabakunahan na at mga hindi pa laban sa COVID-19, sa mga tanggapan at mga pampublikong lugar.
“Mahaba pong diskusyon iyan…and I think the other agencies should be able to provide their recommendations as well,” pahayag ni Health Undersecretary Maria Rosario Vergeire.
Ani Vergeire, titingnan din ang isyu tungkol sa karapatang pantao kapag pinaghiwalay ang mga bakunado sa mga hindi pa nabakunahan.
“Mayroon po kasi tayong tinitingnan diyan na mga karapatang pantao, kapag tayo ay nagkaroon ng ganiyang mga differentiation between the vaccinated and unvaccinated,” ani Vergeire
Idinagdag ni Vergeire na mas mabuti pa ring sumunod sa minimum public health standard ang lahat upang lumiit ang tiyansa na magkahawahan.
Matatandaan na inilutang ni Presidential Adviser for Entrepreneurship and Go Negosyo founder Joey Concepcion kamakailan ang paghihiwalay sa mga bakunado at mga hindi bakunado lalo na sa mga opisina. Posible rin aniyang paghiwalayin ang mga taong nabakunahan sa mga hindi pa bakunado sa mga elevators, offices, fine dining restaurants, sinehan, gyms, at mga enclosed places na hindi maganda ang ventilation.
- Latest
