Babaeng kagawad, itinumba ng tandem

MANILA, Philippines — Namatay noon din ang isang babaeng barangay kagawad matapos na dalawang beses barilin sa ulo ng isa sa dalawang suspek na sakay ng motorsiklo kahapon ng umaga sa Purok 2, Barangay Iba O Este, Calumpit, Bulacan.

Kinilala ang napatay na si Maria Romalie Aguilar Buensuceso, 45, kagawad ng Barangay Mercado, Hagonoy, Bulacan.

Sa ulat, bago naganap ang krimen, alas-10:00 ng umaga ay bumili ang dalawang suspek sa hardware ng biktima at isa dito ay nagtanong sa tauhan ng tindahan kung pwedeng makahingi ng discount.

Kaya naman tinawag ng tauhan ang biktima at sa paglapit sa mga suspek ay  agad na binaril ng dalawang beses sa ulo.

Matapos ang pamamaslang ay mabilis na tumakas ang mga salarin sakay ng motorsiklo.