Impeach Leonen, ibinasura ng Kamara
MANILA, Philippines — Ibinasura kahapon ng House Committee on Justice, ang impeachment complaint na isinampa laban kay Supreme Court Associate Justice Marvic Leonen.
Sa botong 44-0 ay tuluyang ibinasura ng House Committee on Justice na pinamumunuan ni 3rd District Leyte Rep. Vicente “Ching” Veloso ang impeachment complaint na inihain laban kay Leonen dahilan sa kawalan ng ‘sufficiency in form and substance ‘.
Ayon kay Veloso, na walang personal na nalalaman si Edwin Cordevilla, secretary-general of the Filipino League of Advocates For Good Government noong Disyembre 7, 2020, na magprisinta ng ‘authentic’ o tunay na rekord bilang bahagi ng mga ebidensya upang suportahan ang impeachment complaint niya laban kay Leonen base sa Section 1, Rules 16 ng Rules of Court.
Sa 200 pahina ng impeachment complaint ay tanging mga clippings ng mga lumabas na artikulo sa diyaryo, kolumn at maging sa mga report sa online ang ginamit na ebidensya ni Cordevilla.
Sa pagsisimula pa lamang ng pagdinig ay pinagtalunan na ng mga kongresista ang isyu ng ‘sufficiency in form and substance’ para mapatalsik si Leonen kung saan lumilitaw walang personal na kaalaman, haka-haka at tsismis ang basehan ng nasabing reklamo.
Matatandaang inakusahan ni Cordevilla si Leonen ng pagtatraydor sa tiwala ng publiko sa hindi nito pagpapasa ng Statement of Assets, Liabilities, at Net Worth sa pagtatrabaho sa University of the Philippines.
Sa ilalim ng Rules of Procedure in Impeachment Proceeding, kabilang sa grounds ng impeachment ang treason, bribery, graft at corruption, at betrayal of public trust.
- Latest