4 miyembro ng kidnapping group todas sa shootout
MANILA, Philippines — Namatay noon din ang apat na lalaking umano’y mga miyembro ng kidnapping group nang manlaban sa mga miyembro ng PNP Anti-kidnapping Group (AKG) at Quezon City Police District (QCPD) kahapon ng madaling araw sa may bahagi ng Zuzuarregi St., Batasan, Quezon City habang nailigtas naman ang dalawang biktima.
Kinilala ang mga nasawi na sina Wilbert Bonilla, alias Bongbong, ang lider ng grupo at tatlong hindi pa nakikilalang mga tauhan.
Kinilala naman ang mga nailigtas na sina Edmer Tunagan at Michael Pearsons Bongcaras, kapwa empleyado ng Syndtite Construction Company.
Batay sa ulat, bago nangyari ang engkuwentro, ala-1:40 ng madaling araw sa Capitol Hills kanto ng Zuzuarregui St., Brgy. Old Balara ay nagsagawa muna ng isang buwang surveillance at intel monitoring ang mga otoridad matapos makakuha ng impormasyon na plano ng grupo na dukutin ang isang mayamang negosyante sa Quezon City.
Mula nang makuha ang impormasyon ay tinugaygayan na ng isang team ang grupo ni Bonilla hanggang isagawa ng mga ito ang pagdukot kina Tunagan at Bongcaras na lulan ng sasakyan ng kanilang amo na isang Chevrolet na may virtual plate WD9505.
Lulan ng Kia besta van na may plakang YKZ-682 ang mga suspek nang isagawa ng grupo ni Bonilla ang pagdukot sa Commonwealth Avenue kaya’t mabilis na nakipag-ugnayan ang AKG sa QCPD station 6 na mabilis inalerto ang kanilang mga checkpoint habang nakasunod naman ang team ng anti-kidnapping group.
Nabatid na iniwasan ng grupo ni Bonilla ang checkpoint kaya’t sa kaliwang bahagi ng kalsada ang mga ito dumaan habang pinaputukan ang mga pulis na bantay nito na nagresulta sa palitan ng putok.
Nailigtas ang dalawang dinukot na tauhan ng construction company at sinabi ng mga ito na posibleng ang may-ari ng kumpanya ang target dukutin ng grupo.
Nasamsam sa crime scene ang isang M-16 rifle na may magazine at mga bala, tatlong. 45 caliber pistol na may magazine at mga bala at isang. 38 caliber revolver.- Mer Layson
- Latest
