PCSO sinuspinde ang lotto games sa ECQ areas
MANILA, Philippines — Pansamantalang sinuspinde ng Philippine Charity Sweepstakes Office (PCSO) ang operasyon at pagbola ng kanilang lotto at digit games matapos na isailalim ng pamahalaan ang National Capital Region (NCR), Cavite, Rizal, Laguna at Bulacan sa enhanced community quarantine (ECQ).
Sa inilabas na anunsiyo ng PCSO kahapon, epektibo ang suspensiyon sa pagbebenta ng tiket para sa lotto at digit games, gayundin ang pagbola sa mga ito, simula Marso 29, Lunes, hanggang sa Marso 31, Miyerkules, habang nakabinbin pa ang pag-apruba sa kahilingan ng PCSO sa pamahalaan na payagan silang makapagsagawa ng lotto at digit draws sa kanilang punong tanggapan sa Mandaluyong City, na sakop ng NCR.
Samantala, tuloy naman ang operasyon ng small town lottery (STL) at Keno, gayundin ang bentahan ng instant sweepstakes sa mga lugar na hindi sakop ng ECQ maliban na lamang kung may mga pagbabawal na ipalalabas hinggil dito.
Bilang karagdagan, sinabi ng PCSO na magtitigil-operasyon rin ang lahat ng PCSO gaming operations sa buong bansa mula Abril 1 hanggang 4 bilang pag-obserba sa Mahal na Araw, maliban na lamang ito sa STL sa mga lugar na may aprubadong request na makapagsagawa ng selling at draw activities.
- Latest
