Magsuot ng face mask kahit nasa bahay
DILG muling nanawagan sa publiko…
MANILA, Philippines — Upang makaiwas sa coronavirus disease 2019 (COVID-19) ay muling nanawagan ang Department of the Interior and Local Government (DILG) sa publiko na magsuot ng face mask kahit sa loob ng kanilang mga tahanan.
Ang panawagan ay ginawa ni DILG Undersecretary at Spokesperson Jonathan Malaya sa isang online briefing, matapos na makapagtala ang mga Metro Manila hospital ng clustering ng coronavirus disease 2019 (COVID-19) sa mga magkakapamilya o family clustering.
Ayon kay Malaya, ganito rin ang naging mungkahi dati ni Interior Secretary Eduardo Año noong Agosto ng nakaraang taon matapos na naging mabilis na pagtaas ng COVID-19 cases.
“Actually kung maaalala niyo, si Secretary Año nabatikos dyan last year when Secretary Año suggested na mag-face mask sa loob ng bahay, but you know he has been vindicated,” ani Malaya.
Iginiit pa niya na talagang kailangan itong gawin ngayon ng mga mamamayan lalo na kung galing sa labas ng bahay at hindi tiyak kung nakapag-uwi ng virus o hindi.
Paglilinaw naman ni Malaya, ang maaari lamang gawin ng DILG ay manawagan sa publiko na obserbahan pa rin ang minimum public health standards kahit nasa loob ng kani-kanilang tahanan dahil hindi naman nila ito maaaring hulihin doon.
- Latest
