Ulo ng kuya binoga ni utol

MANILA, Philippines — Dead-on-the-spot ang isang magsasaka nang ito ay barilin sa ulo ng nakababatang kapatid na isang sekyu, naganap kamakalawa ng gabi sa Sitio Adelina, Barangay Lagalag, Tiaong, Quezon.

Nakilala ang nasawi na si Benerando Capina, 52, may-asawa habang tumakas ang suspek na si Rode­rick, 50, binata na kinasuhan na ng murder.

Bago nangyari ang krimen, alas-10:30 ng gabi ay masayang nag-iinuman ang magkapatid at nang malasing ay nagkaroon ng mainitang pagtatalo ang mga ito sa hindi pa alam na isyu.

Umuwi sa kanyang bahay ang suspek at pagbalik ay armado na ng kalibre ng baril saka pinaputukan ang kuya sa ulo na agad nitong ikinasawi.

Tumakas agad ang suspek dala ang baril na ginamit sa krimen.