5 sundalo nagpositibo sa COVID-19 habang nasa kampo
MANILA, Philippines — Iniulat ng Cagayan Provincial Health Office na limang tauhan ng Philippine Army ang nagpositibo sa COVID-19 sa loob ng kanilang kampo sa Brgy. Piggatan, Alcala, Cagayan.
Maliban sa isang kasapi na tubong Naguilian, Isabela na nakaranas ng pananakit ng ulo at sipon; ang apat ay pawang asymptomatic o walang nararanasang sintomas.
Ang sundalong may sintomas ay dinala sa Camp Melchor Dela Cruz Hospital sa Gamu, Isabela habang ang nalalabing apat ay isinailalim sa pagsusuri sa pasilidad ng kanilang kampo sa Alcala.
Inaalam sa contact tracing kung paano nahawa ang mga sundalo gayong wala naman silang kasaysayan ng paglalakbay o exposure sa mga nauna nang nagpositibo sa virus.
Ang mga nagpositibo ay unang bahagi ng mga resulta ng pagsusuring isinagawa sa 100- kataong tropa sa kampo ng 77th Infantry Battalion kabilang na ang mga miyembro ng Civilian Armed Forces Geographical Unit (CAFGU) nitong nagdaang dalawang linggo.
- Latest
