Ate patay, utol sugatan sa tanker truck
MANILA, Philippines — Namatay noon din ang 42-anyos na lady rider habang sugatan ang kanyang nakababatang kapatid nang mahagip ng isang 24-wheeler na tanker truck ang kanilang sinasakyang motorsiklo sa Brgy. Talipapa, Quezon City kamakalawa.
Kinilala ang nasawing si Mary Jane Tarroza Reodique, self-employed habang sugatan naman ang kanyang kapatid na si Cyra Jane Tarroza Reodique, 17, estudyante at kapwa residente ng Building G, 121 Camarin, Caloocan City.
Sasampahan ng kaukulang kaso ang driver ng truck na si Raymund Catapia, 34, ng Brgy. Santo Cristo, Sariaya, Quezon.
Sa ulat, bago naganap ang aksidente, alas-10:00 ng umaga sa tapat ng isang gasolinahan sa Mindanao Avenue, patungong Congressional Avenue, Brgy. Talipapa ay minamaneho ng suspek ang isang Howo Tanker truck (NEJ-2327) sa southbound lane ng Mindanao Avenue nang mahagip nito ang mag-ate, na magkaangkas sa isang Motorstar Nicess motorcycle (NG-91983) na noon ay nag-yu-U-turn mula north patungong southbound lane.
Nakaladkad ang motorsiklo at minalas na magulungan ng truck si Mary Jane at maipit sa mga gulong nito, na nagresulta sa kanyang agarang kamatayan.
- Latest
