Quezon City shootout: 5 holdaper todas
MANILA, Philippines — Dead on the spot ang limang pinaghihinalaang holdaper matapos makipagbarilan sa mga operatiba ng Quezon City Police District Special Operation Unit (DSOU) at Highway Patrol Group sa Quezon City kahapon ng madaling araw.
Wala pang pagkakakilanlan ang mga napatay na suspek.
Sa ulat, bago naganap ang shootout, alas-4:00 ng madaling araw ay hinoldap ng mga armadong suspek ang Uno Gasoline station na matatagpuan sa Espiritu Compound, Pingkian 2, Brgy. Pasong Tamo.
Walang kamalay-malay ang mga suspek na ito ay nasaksihan ni P/MSG Ericson Remigio ng PNP Legal Service dahilan para sundan ang mga tumatakas na suspek saka humingi ng tulong sa QCPD-HPG na kasalukuyang nagsasagawa ng anti-carnapping operation sa kahabaan ng Atherton St., Brgy. North Fairview.
Mabilis na rumesponde ang mga operatiba ng HPG at hinabol ang mga suspek na naghiwalay na kung saan ay nakorner ang dalawa sa kahabaan ng Baloyot Drive, Brgy. Sauyo at sa halip na sumuko ay nanlaban umano ang mga ito at napatay.
Tinugis ang tatlo pang suspek at nakorner ang mga ito sa kanto ng Espiritu Compound, Pingkian 2, Brgy. Pasong Tamo, subalit sa halip na sumuko ang mga ito ay nakipagbarilan umano na nagresulta ng kanila ring kamatayan.
Narekober ng Scene of the Crime Operatives (SOCO) investigator ang mga ginamit na baril ng mga suspek at motorsiklo.
- Latest