Re-opening ng mga sinehan binawi
MANILA, Philippines — Kinansela kahapon ng Inter-Agency Task Force for the Management of Emerging Infectious Diseases (IATF-EID) ang nakatakda sanang pagpapabukas ng mga tradisyunal na sinehan ngayong araw na nasa ilalim ng general community quarantine (GCQ) matapos ang pagtutol ng mga Metro Manila mayors.
Ayon kay Metro Manila Council (MMC) chairman at Parañaque City Mayor Edwin Olivarez, pumayag na rin ang economic team ng IATF-EID na ipagpaliban muna ang pagbubukas ng mga sinehan matapos silang makipagpulong at umapela.
“The economic team of IATF has allowed to defer the implementation regarding the opening of cinemas in the metropolis,” aniya.
Ang apela sa IATF ay bunsod ng mga pangamba ng mga alkalde sa National Capital Region (NCR) sa muling pagtaas ng kaso ng COVID-19 dahil sa re-opening ng mga sinehan bukod pa sa hindi rin ito dumaan sa masusing konsultasyon.
Kahit, aniya kinonsulta ang mga local government units sa Metro Manila ng IATF sa ibang usapin, hindi naman umano naging specific ang isyu sa reopening ng mga sinehan.
Kaugnay nito, sinabi ni Presidential Spokesperson Harry Roque na hihintayin rin muna nila ang panuntunang ilalatag ng mga LGUs sa NCR bago ang re-opening ng mga sinehan.
“Hindi na po iyan mapapatupad ngayong araw at iyan po ay ipapatupad either March 1 or kung kailan po magkakaroon ng guidelines ang ating mga lokal na pamahalaan,” ani Roque. - Malou Escudero
- Latest