KTV bar ni-raid: 52 na-rescue, 5 arestado
Mga parokyano nahawa sa COVID-19
MANILA, Philippines — Nasagip ang may 52 babae habang limang hinihinalang bugaw ang nadakip sa pagsalakay ng mga atworidad sa isang KTV bar na hinihinalang front ng prostitusyon sa Clark Freeport Zone sa Mabalacat City, Pampanga kamakalawa.
Kinilala ni Central Luzon Police Office director Brig. General Valeriano De Leon ang mga nadakip na sina Lauren Sta Iglesia, 24-anyos; Hazzel Sanchez, 28; Alysa Bautista, 21; Meli Ngo, 58 at Prince Cedrick Galang, 24, na pawang nahaharap sa kasong paglabag sa Expanded Anti-Trafficking in Persons Act of 2012.
Ayon kay De Leon, ikinasa ang raid ng pinagsanib na anti-trafficking operations ang Special Concern Unit (SCU) Regional Anti-Trafficking in Persons Task Group, Mabalacat Police sa pakikipagkoordinasyon sa Department of Social Workers Regional Office 3 sa isang KTV Bar sa Fontana Leisure Park, CM Recto Highway ng Clark Freeport Zone matapos silang makatanggap ng reklamo mula sa mga naging parokyano ng mga babae na nahawaan umano ng sexually transmitted disease at COVID-19.
Ayon sa report, agad na dinakma ng mga operatiba ang limang suspek nang tanggapin nila ang entrapment money bilang kabayaran sa mga babaeng pumayag na makipagtalik sa mga pulis na nagbalatkayong kustomer.
Isinailalim na rin sa pagsusuri ang mga nasagip na kababaihan upang matukoy kung may taglay silang virus at iba pang nakahahawang sakit. - Raymund Catindig
- Latest
