Ligtas na pagbati sa COVID-19 pandemic pasado na
MANILA, Philippines — Nakapasa na sa ikatlo at huling pagbasa sa Mababang Kapulungan ng Kongreso ang panukala para sa makabago at ligtas na pamamaraan nang pagbati ng mga Pinoy sa gitna na rin ng krisis sa kalusugan dulot ng COVID-19 pandemic.
Sa botong 212 mambabatas na pumabor , isa ang tumutol ay tuluyan ng nakapasa kamakalawa ng gabi ang House Bill (HB) No. 8149 o ang panukalang Bating Filipino Para sa Kalusugan Act.
Ang nasabing panukala ay iniakda ni 1st District Marikina City Rep. Bayani “BF” Fernando na naglalayong hindi magkahawaan sa COVID-19 pero taglay pa rin ang respeto sa pagbati sa mga nakatatanda, pamilya,maging sa mga kaibigan at iba pang kapwa tao.
Alinsunod sa nasabing panukala ni Fernando, inirerekomendang batiin ng mga Pilipino ang kanilang kapwa sa pamamagitan nang paglalagay sa kanang kamay sa gitna ng dibdib na sasabayan nang pagyuko ng ulo.
Samantalang dapat nakapikit ang mata ng taong gumagawa nito.
Hindi naman nakasaad sa panukala na papatawan ng parusa ang sinumang hindi susunod sa makabagong pamamaraan ng pagbati.
- Latest