Lady solon niresbakan ang PACC sa pagkakasama sa listahan
MANILA, Philippines — Binatikos ni House Committee on Health chairperson Dr. Angelina “Helen” Tan nitong Martes ang Presidential Anti-Corruption Commission (PACC) sa pagbigay ng “walang basehang” ulat kay Pangulong Rodrigo Duterte na idinawit ang kanyang pangalan sa diumano’y katiwalian sa Department of Public Works and Highways (DPWH).
“Ang inilabas na ulat kamakailan ng Presidential Anti-Corruption Commission (PACC) na idinawit ang aking pangalan sa diumano’y katiwalian kaugnay sa palpak na proyekto ng Department of Public Works and Highways (DPWH), na binanggit ni Pangulong Rodrigo Roa Duterte sa kanyang ‘Talk to the Nation’ noong 28 December 2020, ay hindi lamang mapanirang-puri kundi nagpapahamak dahil sa kakulangan nito ng ebidensya — isang katotohanan na tinukoy mismo ng Pangulo sa kanyang talumpati at ako ay labis na nalulungkot sa paratang sa akin,” pahayag ni Quezon 4th District Rep. Tan.
Anya, ang naturang “walang basehang akusasyon” laban sa kanya ay nag-ugat sa Gumaca Bypass Road, isang infrastructure project na kanyang isinulong noon pang 2016 na nagkakahalaga ng P800-million project upang maibsan ng 20 minutong paglalakbay ang mga motorista sa Gumaca, Quezon.
Nilinaw ni Tan na malinis ang kanyang konsensya at handa siyang makipagtulungan sa imbestigasyon upang ganap nang matuldukan ang isyung ito.
- Latest
