2 opisyal ng NPA timbog sa bahay ng Bokal
MANILA, Philippines — Naaresto ng puwersa ng pulisya at militar sa bisa ng warrant of arrest ang dalawang mataas na opisyal ng New People’s Army (NPA) sa loob ng pamamahay ng isang bokal sa Zone 3, Poblacion, Atimonan, Quezon, kamakalawa ng alas-3:00 ng hapon.
Kinilala ang dalawang NPA opisyal na sina Ruel Custodio, alias Baste, na tumatayong finance officer at Ruben Istokado, alias Oyo/Miles, na nagsisilbing political adviser ay inaresto sa loob ng pamamahay ni 4th district Board Member Rhodora Tan.
Hindi na nakaporma ang dalawang NPA nang arestuhin at nakuha buhat sa kanilang pag-iingat ang dalawang granada, isang caliber 380 na may magazine at 13 bala, isang kalibre 45 at magazine at isang cal.9MM.
Nabatid na si Custodio ay responsable sa pangongolekta ng revolutionary tax o butaw sa mga grupo, o korporasyon sa lalawigan ng Quezon at nahaharap sa mga kasong kidnapping at paglabag sa RA 10591 habang si Istokado ang siyang nakatoka sa pagpapakalat ng mga subersibong dokumento at blackpropaganda laban sa pamahalaan at may kinakaharap na mga kasong double murder at multiple homicide noong 2014.
Wala pang pahayag si Tan tungkol sa presensya ng mga NPA na nagkukuta umano sa kanyang pamamahay.
Kamakailan ay inaprubahan ng Anti-Terrorism Council (ATC) sa pamamagitan ni Executive Secretary Salvador Medialdea bilang pinuno, ang Resolution No. 12 na pormal na nagtuturing sa Communist Party of the Philippines (CPP) at ang hukbong sandataan nito, ang New People’s Army (NPA), bilang grupong terorista sa bansa, alinsunod sa Section 4 ng Anti-Terrorism Act.
- Latest