Shabu nabisto sa ulo ng litsong baboy
MANILA, Philippines — Balik-kulungan ang bagong layang suspek matapos masamsaman ng shabu na inilagay sa ulo ng litsong baboy sa pamamagitan ng “paabot” sa loob ng district jail sa Brgy.Talipan, Pagbilao, Quezon.
Ang suspek na si Leonardo Dominguez, 36, residente ng Barangay Ilayang Iyam, Lucena City ay kalalaya lamang noong buwan ng Nobyembre ng kasalukuyang taon matapos na magplea-bargaining makaraang makulong sa kasong paglabag sa droga.
Ayon sa ulat ni PMaj.Milo Tabernilla, chief of police, alas-2:30 ng hapon ay nagtungo ang suspek sa Talipan BJMP District Jail upang ibigay sa pamamagitan ng “paabot “ ang litsong ulo ng baboy sa isang nakapiit na isa ring drug suspect.
Habang nirerekisa ng mga BJMP trainees ang litson ay napansin nila sa gawing itaas ng ulo ang isang itim na electrical tape, at nang kunin nila at buksan ay doon na tumambad ang isang plastic sachet ng hinihinalang shabu na tinatayang aabot sa 3 gramo.
Inaresto ng mga operatiba ng BJMP ang suspek at inamin na shabu ang nakuha sa kanyang dalang litson na para sa isang presong nakakulong sa nasabing piitan.
Nabatid na nakalusot ito ng dalawang beses na pagpapaabot at binabayaran umano siya ng hindi pinangalanang boss niya ng halagang P500 kada pag-aabot ng pagkain sa piitan.
- Latest