AFP sa CPP-NPA: Walang tigil putukan!

MANILA, Philippines — Walang balak ang Armed Forces of the Philippines (AFP) na irekomenda kay Pangulong Rodrigo Duterte ang pagdedeklara ng ceasefire sa CPP-NPA ngayong holiday season.

Ayon kay AFP Spokesman Maj. Gen. Edgard Arevalo, ilang ulit nang nagpakita ng kawalan ng sinseridad ang mga komunista kapag nagdedeklara ng holiday truce ang pamahalaan.

Taun-taon ay lumalabag aniya ang mga komunista sa kanilang sariling ceasefire declaration.

Ayon kay Arevalo, pumapasok lamang sa peace talks ang mga komunista para sila ay magkaroon ng tsansa na mag-regroup at mag-recruit ng mas maraming miyembro.

Giit ni Arevalo, hindi nila papayagan na linla­ngin sila ng makakaliwang grupo hanggang hindi nagagapi ang tunay na utak ng karahasan.

Batay sa record ng militar, napatay ang isang sundalo at sugatan ang walo nang umatake ang NPA sa Camarines Sur at Iloilo, ilang araw bago mag-Pasko na paglabag sa holiday ceasefire.