Minors bawal pa rin sa malls sa Metro Manila

MANILA, Philippines — Kinumpirma ni Interior Secretary Eduardo Año na hindi pa rin papayagan ang mga menor-de-edad na makapasok sa malls lalo na sa mga lugar na nasa general community quarantine (GCQ) hangga’t walang inilalabas na resolusyon at ordinansa mula sa local government units.

Ito ang paglilinaw ni Año makaraang ianunsyo ni Metro Manila police chief Brig. Gen. Vicente Danao na hindi pa rin papayagan ang mga menor-de-edad sa pagpasok sa mall.

 “Yes, that’s right. Kailangan lumabas muna ang resolution nila [LGUs],” pahayag ni Año.

Nauna rito, inanunsyo ni Pangulong  Duterte, na nasa ilalim ng GCQ mula Disyembre 1 hanggang 31 ang National Capital Region, Batangas, Iloilo City, Tacloban City, Lanao del Sur, Iligan at Davao City.

Ang iba pang bahagi ng bansa ay nakapailalim sa mas maluwag na modified general community quarantine. - Malou Escudero, Danilo Garcia