Deployment ban sa nurses inalis na ni Duterte
MANILA, Philippines — Kinumpirma kahapon ng Department of Labor and Employment (DOLE) na binawi na ni Pangulong Rodrigo Duterte ang “deployment ban” sa mga nurses at iba pang health workers sa ibayong dagat,
Ayon kay Labor Secretary Silvestre Bello III, ang lifting ng ban ay “effective immediately” kaya’t maaari nang makaalis ang libong nurses at medical workers na nag-aasam na makapagtrabaho sa ibang bansa sa kabila ng COVID-19 pandemic.
Gayunman, nilinaw ni Bello na 5,000 health workers lang ang pinapayagang ma-deploy sa ibang bansa kada taon upang matiyak na ang Pilipinas ay may sapat pang medical professionals lalo na ngayong ang bansa ay pangalawa sa may pinakamataas na bilang COVID-19 cases sa Southeast Asia.
Sa nakaraang desisyon, pinayagan lamang ni Duterte ang health professionals na may kumpleto nang employment documents at visa hanggang Agosto 31 na makaalis ng bansa. - Malou Escudero
- Latest