State of calamity idineklara sa Cagayan at Isabela
MANILA, Philippines — Idineklara na kahapon ang “state of calamity” sa mga lalawigan ng Cagayan at Isabela bunsod ng sunud-sunod na bagyo at walang puknat na pag-ulan na sumalanta sa mga pananim, imprastraktura, ari-arian at kumitil ng maraming buhay.
Batay sa Resolution No. 2020-10-768, agad na inaprubahan ng mga miyembro ng Sangguniang Panlalawigan na isailalim ang buong Cagayan sa state of calamity para gamitin ang quick response fund sa pagbibigay ng agarang ayuda sa mga pamilyang naapektuhan ng mga pagbaha.
Ayon kay Gov. Manuel Mamba, ang malawakang pagbaha sa Cagayan ang may pinakamalawak at pinakamalaking pinsala sa kasaysayan ng lalawigan sa nakalipas na mahigit 40 taon matapos na tamaan ang 26 na bayan nito at isang lungsod kung saan 9 ang naitalang nasawi, maraming kabahayan ang nawasak at tinatayang 43,838 pamilya o 175,000 indibiduwal mula 215 barangay ang naapektuhan sa tubig-baha dulot ng bagyong Ulysses.
Sinabi ni Mamba na ang Cagayan ang sumasalo ng lahat ng malalaking ilog na dumadaloy mula sa mga kalapit na lalawigan tulad ng Apayao, Kalinga, Mt. Province kabilang na ang Ibulao River ng Ifugao at Magat River ng Nueva Vizcaya na pumupuno naman sa Magat Dam na nagpakawala rin ng tubig, bago dumaloy at nagpaapaw sa dambuhalang Cagayan River kung saan umaagos din lahat ang mga ilog sa Isabela.
Nanawagan na ng tulong si Mamba sa national government dahil sa inabot nilang delubyo matapos na magmistulang Pacific Ocean ang malaking bahagi ng kanilang lalawigan. Aniya, nasa 47,081 residente na ang nai-rescue hanggang nitong Biyernes ng gabi at marami pa ang naghihintay ng tulong na masagip sila sa mga bubungan ng kanilang mga tahanan.
Samantala, isinailalim din sa state of calamity ang Isabela matapos aprubahan ni Isabela Vice Governor Faustino Dy III ang Provincial Board Resolution kasunod ng 12 araw na walang puknat na pananalasa ng mga bagyong Rolly, Siony, Tony, Ulysses at ang Amihan sa lalawigan. - Victor Martin, Joy Cantos
- Latest