Sangkot sa ‘pastillas scheme’... 86 opisyal at tauhan ng BI kinasuhan
MANILA, Philippines — Umaabot sa 86 opisyal at tauhan ng Bureau of Immigration (BI) na sangkot sa kontrobersyal na “pastillas scheme” ang inirekomendang kasuhan ng National Bureau of Investigation (NBI) ng kriminal at administratibo.
Kabilang sa kinasuhan ay ang walong opisyal ng BI kasama na si dating Commissioner Marc Red Mariñas na siyang itinuturong mastermind ng sindikato.
Parte rin umano ng iligal na operasyon ang lahat ng pinuno ng Terminal Control and Enforcement Unit ng Ninoy Aquino International Airport Terminal 1, 2 at 3 at lahat ng pinuno ng Border control and Intelligence Unit.
Sa 86 na kinasuhan, 19 dito ay kabilang sa unang batch na kinasuhan ng NBI at 67 ay mga bagong personalidad.
Bukod sa pera na ibinabalot sa dyaryo kung saan nakuha ang termino na pastillas, ilan sa mga sinampahan ng kaso ay tumanggap rin ng mga regalo maging sex sa mga dayuhang babae na pumapasok sa bansa bilang sex workers.
Kumpiyansa naman si NBI Special Action Unit chief, Atty. Jun Donggalo na malakas ang kanilang mga ebidensya at matibay na testimonya ng ikalawa nilang ‘whistle-blower’ na si Dale Ignacio na kumumpirma sa mga ipinagtapat ng una nilang saksi na si Immigration Officer Allison Chiong.
- Latest