Malacañang ‘di magbibigay ng timeline sa balanseng P500 milyon ng PhilHealth sa Red Cross
MANILA, Philippines — Ayaw na munang magbigay ng timeline ang Palasyo ng Malacanang kung kailan babayaran ng PhilHealth ang balanse na P500 milyon na utang sa Red Cross para sa COVID-19 swab test sa mga umuuwing OFW.
Ayon kay Presidential Spokesman Harry Roque, mahirap na paasahin ang Red Cross lalo’t nakararanas ngayon ang bansa ng sunud-sunod na bagyo.
“Mahirap kasing magbigay ng timeline sa gobyerno ano, lalo na sa panahon na ganito na nasasalanta tayo ng mga bagyo gaya ni Rolly ‘no,” ani Roque.
Hindi naman aniya dapat na mag-alala ang Red Cross dahil sapat ang pondo ng pamahalaan para bayaran ang utang.
Mismong si Pangulong Rodrigo Duterte na aniya ang nagbigay ng garantiya na hindi tatakbuhan ng PhilHealth ang utang.
Sa ngayon, may ginagawa pang pag-aaral ang Department of Justice (DOJ) sa pinasok na kasunduan ng PhilHealth sa Red Cross para sa swab test.
- Latest