AFP-NOLCOM umalerto sa bagyong Siony
MANILA, Philippines — Inihayag ni AFP-Northern Luzon Commander Major Gen. Arnulfo Burgos Jr., nakahanda na ang tropa na magdeploy ng 249 Disaster Response teams ng mga sundalo sa mga lugar sa hilagang Luzon na nagbabadyang tamaan ng bagyong Siony.
Sa ulat ng weather forecaster ang bagyong Siony, ang ikatlong bagyo na tatama sa bansa sa loob ng tatlong linggo ay hahagupit sa Northern Luzon na pinangangambahan ngayong araw o Biyernes depende sa kilos ng nasabing unos na patuloy na minomonitor.
Binigyang diin ni Burgos na may sapat na kasanayan ang tropa ng mga sundalo sa Humanitarian Assistance Disaster Response (HADR) sa panahon ng kalamidad partikular na sa paghagupit ng mga bagyo.
Ayon kay Burgos bilang bahagi ng pro active measure ng AFP-NOLCOM, 249 Disaster Response Teams ang minobilisa na at idineploy sa Ilocos Region, Cagayan Valley, Central Luzon at Cordillera Administrative Region upang magsagawa ng search, rescue and relief operations.
Ayon sa weather bureau ay napanatili ni Bagyong Siony ang kanyang lakas habang patuloy ang pagkilos ng mabagal sa may Philippine Sea silangan ng Extreme Northern Luzon at sa layong 755 kilometro ng silangan ng Basco, Batanes taglay ang lakas ng hangin na umaabot sa 85 kilometro bawat oras malapit sa gitna at may pagbugso ng hangin na umaabot sa 105 kilometro bawat oras.- Angie dela Cruz
- Latest
