Bagyong Quinta magla-landfall sa Kabikulan

MANILA, Philippines — Inaasahang magla-landfall ang bagyong Quinta sa buong Bicol region  sa pagitan ngayong Linggo ng gabi hanggang bukas o Lunes ng umaga saka kikilos pakanluran papunta ng Southern Luzon.

Ayon sa PAGASA, bahagyang lumakas ang bagyong Quinta habang kumikilos pakanluran hilagang kanluran papunta sa Philippine sea.

Alas-10 ng umaga, ang sentro ni Quinta ay namataan sa layong 660 kilometro (km) ng sila­ngan ng Catarman, Northern Samar o nasa layong 730km ng sila­ngan ng Juban, Sorsogon.

Si Quinta ay patuloy ang pagkilos pakanluran hilagang kanluran sa bilis na 30km bawat oras taglay ang lakas ng ha­ngin na umaabot sa 55km bawat oras malapit sa gitna at may pagbugso ng hangin na umaabot sa 70km bawat oras.

Bunga ito, nakataas ang signal number 1 ng bagyo sa Catanduanes.

Ngayong umaga, si Quinta ay inaasahang nasa layong 320 kilometro ng silangan ng Virac, Catanduanes. Sa Lunes, nasa bisinidad ng Libmanan, Camarines Sur ang bagyo habang sa Martes, sa layong 265 kilometro ng kanluran ng Ambulong, Batangas at sa Miyerkules ay inaasahang nasa labas na ng Pilipinas.