Ginang pinatay ng nobyo sa motel

MANILA, Philippines — Wala ng buhay nang matagpuan ang 44-anyos na si Brenda Bruno, meat vendor, ng Brgy. Cabatling sa loob ng isang motel sa Malasiqui, Pangasinan matapos na patayin sa sakal ng kanyang nobyo.

Batay sa report ng pulisya, alas-3:00 ng hapon nang madiskubre ang bangkay ng biktima sa loob ng motel.

Bago ito, alas-9:30 ng umaga noong Sabado nang mag-check-in ang biktima sa motel kasama ang hindi pa kilalang lalaki sakay ng tricycle.

Makalipas ang 15 minuto ay umalis ang lalaki na sakay ng tricycle at ilang oras na ang nakalilipas ay hindi pa rin ito bumabalik.

Nagpasya ang pamunuan ng motel na pasukin ang kuwarto ng biktima at bumungad sa kanila ang bangkay ng babae na nasa sahig.