Holdaper na nakamotor patay sa barilan

MANILA, Philippines — Namatay noon din ang isang holdaper na angkas ng motorsiklo nang makipagbarilan sa mga rumespondeng pulis habang nakatakas ang kasama nito naganap kamakalawa ng gabi sa Pasay City.

Ang suspek ay kinilalang si Alberto Soriano, 46, nakatira sa Tramo Street, ng naturang lungsod habang inaalam pa ang pagkakakilanlan ng nakatakas nitong kasama.

Sa ulat, bago naganap ang barilan, alas-8:30 ng gabi sa may Menlo Street, Brgy. 33, ay hinoldap ng mga ito ang biktimang si Roceselyn Jobelo, 33, isang service crew at sapilitang kinuha ang kaniyang cellular phone at alahas.

Tiyempong nagpapatrulya sa lugar ang isang mobile unit ng Pasay Police na naaktuhan ang nagaganap na holdap at nagkaroon ng maigsing habulan at putukan na kung saan nasapol ang suspek at nalaglag sa motorsiklo.