COVID-19 Anti-Discrimination Act, pasado na sa Kamara
MANILA, Philippines — Nakapasa na sa pinal at ikatlong pagbasa sa Mababang Kapulungan ng Kongreso ang panukalang batas na nagbabawal sa diskriminasyon laban sa mga frontliners partikular ang mga health workers, service workers, overseas Filipino workers (OFWs) at iba pa na may kinalaman sa COVID-19.
Ang House Bill (HB) 6817 o ang COVID-19 Related Discrimination Act, ay iniakda ni 6th District Quezon City Rep. Jose Christopher “Kit” Belmonte upang tuldukan ang diskriminasyon na nararanasan ng mga frontliners, OFWs at maging ang mga Person Under Investigation (PUIs) at mga nagpositibo sa coronavirus.
Sa botong 204 pabor, walang tumutol at isa ang abstain ay nakapasa sa pinal at ikatlong pagbasa ang Anti-COVID Discrimination Act.
“The bill provides penalties for stigmatization, harassment, assault, and unreasonable refusal to honor valid and existing contracts on the basis of COVID-19,” pahayag ni Belmonte.
Isinulong ni Belmonte ang nasabing panukalang batas dahil marami sa mga health workers partikular na ang mga doktor at nurses ang dumaranas ng matinding diskriminasyon sanhi ng COVID-19 kung saan ay may mga napapalayas sa mga boarding house.
- Latest