Recruitment, career training sa PNP balik na sa Hunyo 1
MANILA, Philippines — Inianunsyo ng Philippine National Police (PNP) na babalik na muli ang recruitment program sa mga nagnanais na maging pulis at ang PNP mandatory career training courses sa “new normal” simula bukas, Hunyo 1.
Ayon kay PNP Spokesman Police Brig. Gen. Bernard Banac, ito’y matapos na ipalabas ni PNP Chief Police General Archie Gamboa ang memorandum sa tanggapan ni P/Major General Amador Corpus ng Director for Human Resource Doctrine and Development hinggil sa mga bagong panuntunan sa pagsasagawa ng pagsasanay at recruitment program.
Ang recruitment program ay mag-uumpisa muli sa ilalim ng superbisyon ng bagong tatag na PNP Recruitment and Selection Service (PNP-RSS) sa Hunyo 1 para sa mga nakabimbing mga aplikante para sa 1st Cycle 2020 Recruitment and Regular Atrition Quota para sa mga bagong Patrolman at Patrolwoman at lateral entry program para mapadagdag sa malakas na 205,000-strong police force.
“I am pleased to announce that the PNP Recruitment and Selection Service (RSS) will resume processing of applications for recruitment to fill existing vacancies for recruitment, lateral entry, and cadetship program,” pahayag ni Gamboa.
Alinsunod sa memorandum, ang lahat ng mga training courses at training programs ay magbabalik muli sa Hunyo 1 base sa Omnibus Guidelines sa implementasyon ng enhanced community quarantine (ECQ) at general community quarantine (GCQ).
Ang mga aplikante ay maaaring silipin ang official website www.pnprss.com at official Facebook page: PNP Recruitment and Selection Service-PNP RSS para sa mga advisory.
- Latest
