2 Chinese dinakip sa ilegal na COVID clinic sa Makati
MANILA, Philippines — Dalawang Chinese nationals ang naaresto ng mga otoridad nang salakayin ang kanilang medical clinic at pharmacy na ilegal na nag-ooperate at nanggagamot ng mga hinihinalang COVID patients, kamakalawa ng gabi.
Ang mga naarestong suspek ay kinilalang sina Dr. David Lai, 49, at Bruce Liao, alyas Songhua Liao, 41, kapwa residente ng Unit-4D One Central Tower, Makati City.
Dakong, alas-3:30 ng hapon kamakalawa nang salakayin ang Goldstar Medical Clinic and Pharmacy Corp. na matatagpuan sa Unit 501-506 5th floor ng New Lasema Spa Building sa Sampaloc Street., Makati City.
Ayon kay P/Major Gideon Ines, ng Station Investigation and Detective Management, nagsagawa sila ng inspeksiyon laban sa nasabing clinic matapos makipag-ugnayan kay Felipe Albayda Jr., ng Makati Health Department Incident Management Team Task Force COVID-19 kaugnay sa impormasyon na ang nasabing establisimyento ay may ilegal na aktibidad tulad ng panggagamot sa suspected COVID-19 patients.
Ang suspek na doktor ay nanggagamot umano ng mga hinihinalang COVID-19 patients sa kabila ng kawalan ng lisensiya na magpraktis sa Pilipinas ng kanyang propesyon at kawalan pa ng permit to operate ng klinika na may medical facility.
Nakumpiska sa klinika ang Rapid Test kits para sa COVID-19 at iba pang medical paraphernalia gaya ng swab sticks, vials at syringes.
May nakuha ring kahon-kahong Chinese medicine na hindi rehistrado sa Food and Drug Administration (FDA).
May dinatnan pa ang mga operatiba na apat umanong pasyente at dalawang staff.
Naniniwala naman si Makati City Police Station chief, P/Colonel Oscar Jacildo na posibleng may kaugnayan ang operasyon ng nasabing klinika sa nadiskubreng underground clinic sa Fontana Leisure Park, sa loob ng Clark Freeport Zone, sa Pampanga noong Mayo 19, 2020.
Halos pareho umano ang operasyon ng dalawang underground clinic sa Fontana at sa Makati na posibleng iisa lang ang nagtayo nito at may iba pang mga nasa likod ng operasyon.
- Latest