134 barangay execs, nahaharap sa reklamo vs anomalya sa cash aid

MANILA, Philippines — Inihayag ng Department of the Interior and Local Government (DILG) na umabot na sa 134 ang bilang ng mga opisyal ng barangay na nahaharap sa rekla­mong kriminal dahil sa hinihinalang anomalya sa Social Amelioration Program (SAP) pay-out.

Sinabi ni Interior Secretary Eduardo Año na ang naturang ng bilang ay 320 porsyentong pagtaas mula noong nakaraang linggo nang maiulat ang 42 opisyal ng barangay na respondent sa reklamong isinampa ng Philippine National Police-Criminal Investigation Group (PNP-CIDG).

“Hindi ninyo matatakasan ang mga panlolokong ginawa ninyo sa pamimigay ng ayuda. Sinira ninyo ang tiwala ng gobyerno at ng inyong mga kabarangay kaya sa kalaunan, sa kulungan ang bagsak ninyo,” saad ni Año.

Giit ng kalihim, 9 na kaso pa ang ihahain ng pulisya sa mga susunod na araw, at sinabing pinabibilis na nito ang case build-up sa 86 na iba pang kaso. Kabuuang 318 na reklamo ang napunta sa PNP-CIDG at sa regional field units nito upang iulat ang maanomalyang aksyon ng mga opisyal ng kanilang mga barangay nang magkaroon ng distribusyon sa SAP.