Tulak nanlaban sa drug bust, patay
MANILA, Philippines — Isang 37-anyos na hinihinalang tulak ng droga ang nasawi matapos umanong manlaban sa mga pulis sa ikinasang buy-bust operation sa Purok-5, Brgy. San Isidro, Talisay, Camarines Norte kamakalawa ng gabi.
Ang suspek na hindi na umabot nang buhay sa ospital dahil sa dalawang tama ng bala sa katawan ay kinilalang si Arthur Michael Teves alyas “Tonton”, binata, ng Brgy.1 at kasama sa recalibrated regional priority data base sa ilegal na droga.
Sa ulat, alas-10:00 ng gabi nang ilatag ng mga miyembro ng Police Regional Office-5, Regional Mobile Force Batallion at Talisay Police ang buy-bust laban sa suspek at umaktong poseur buyer si Senior M/Sgt. Johnwell Cada Almanzar kasama ang isang impormante at nakipagtransaksyon. Nakahalata naman ang suspek na pulis ang kaharap kaya mabilis umanong bumunot ng kanyang kalibre 45 na baril at pinutukan ang operatiba, pero hindi tinamaan.
Dahil dito, gumanti ng putok ang mga pulis dahilan para masapol ang suspek sa katawan na agad isinugod sa Camarines Norte Provincial Hospital sa Daet pero idineklara siyang patay ng doktor.
- Latest